Vide tomar un Vermú con CREA

Os directores galegos comparten experiencias virtuais entre olivas con óso

Este venres, a partir das 13.30 horas o Carballo Interplay colle forma de bar cuns parroquianos ben particulares. CREA, a Asociación de Directores e Realizadores de Galicia, achega a Carballo os seus encontros informais entre directores nunha edición na que as webseries serán as absolutas protagonistas. Realizadores consagrados no campo das series de ficción como Jorge Coira ou Giselle Llanio compartirán a súa experiencia cos directores dalgunhas das producións en competición no Interplay: Jorge Cassinello, director de Entre Pipas, recente Mestre Mateo á mellor webserie galega decantarase polos aperitivos salgados; Pablo Cacheda, director de Clases de lo Social, que nuns días inicia a rodaxe da súa segunda tempada, ha de coller forzas con algunha bebida isotónica. Os creadores da serie de animación Un Sitio Distinto, Nanny Mouro, Fran Rodríguez e Fernando Calvo son máis de quintos e barra como no mesmísimo Miñanco. Manolo Gago Rubén Lino e Dani Vilaverde son Poetarras dos de inspiración con alta graduación. Nas súas Conversas con Cunqueiro, Jorge Boquete fíxose incondicional das cuncas de ribeiro. E Ana Lois, directora da webserie documental Palabras Secretas aínda ha traer  algunha infusión da avoa. Vaia, que vai ser un vermú para todos os gustos.

Esta primeira edición do Vermú con CREA recolle a tradición do que a Asociación de Directores e Realizadores de Galicia bautizou no seu momento como “Cafés con CREA”. Trátase de conversas desenfadadas entre directores, a medio camiño entre a terapia de grupo e o encontro con amigos, nas que poder poñer sobre a mesa dúbidas, inquedanzas ou sensacións para compartilas con xente que sabe ben do que estás a falar. Nos últimos anos os Cafés con CREA pasaron por festivais como o Curtocircuito, Cans ou o S8 e a súa chegada a Carballo procura verquer luz sobre o oficio da dirección nun formato tan novidoso como a webserie.

Así que xa sabedes, se vos apetece coñecer de primeira man o traballo da dirección de webseries, compartir a vosa experiencia, resolver as vosas dúbidas ou simplemente tomar un vermú con xente cargada de anécdotas e ilusións o voso sitio está no Fórum de Carballo este venres a partir das 13:30 horas.

con XOSÉ A. TOURIÑÁN apadriñado por FELIPE G. GIL e MARÍA YÁÑEZ (EMBED)

Sábado 26 // 12:30 -13:30 no Auditorio do Forum

O colectivo EMBED presenta o Código Fonte Audiovisual, un formato híbrido entre a conferencia e a proxección no que se convida un “curator” para que seleccione e comente pezas de vídeo “embebibles” que sexan referenciais para esa persoa: o seu código fonte de cultura audiovisual.

Os CFA inauguráronse en marzo de 2010, no 12 Festival Internacional ZEMOS98 de Sevilla, e dende entón lévanse feito máis dunha ducia en distintos eventos e lugares do Estado, e tamén en forma de artigos para a publicación EMBED.

Onde nunca se fixeran era en Galicia, e para todo hai unha primeira vez. O convidado elixido é Xosé Antón Touriñán, que nos fará unha “videocontada” en torno ao imaxinario audiovisual que proxectamos desde Galicia a través dos vídeos que se poden ver en Youtube.

Xosé A. Touriñán. A súa vis cómica converteuno en poucos anos nunha das caras máis coñecidas da canle autonómica, onde ten interpretado personaxes para programas de variedades e teleseries. Levou o seu humor a formatos como programas nocturnos, sketches, comedias de situación e espazos divulgativos. Ademais presentou a gala dos Premios Mestre Mateo en 2010 e 2011. Tamén ten experiencia pùntual en radio, teatro e cinema. Na televisión comezara en 2005 dentro do Supermartes, xa interpretando o papel que o popularizou, o de Mucha do dúo As cantareiras de Ardebullo formado con Marcos Pereiro. Estes personaxes pasaron despois a Luar, e desde 1999 protagonizan monólogos ao vivo, pregóns e actuacións ao aire libre e en locais. Na actualidade podémolo ver no programa da TVG A casa da Conexa.

Felipe G.Gil. atopábase na barriga da súa nai cando Tejero entrou pegando disparos no Congreso. Máis tarde adicouse a gravar programas de radio en cintas de casete e a fantasear con que un día sería un gran comunicador. Tras unha breve crise de 3 días e 10 minutos (exactamente) na que dubidou se facer a carreira de administración e dirección de empresas, cometeu un dos seus mellores erros da súa vida: estudiar Comunicación Audiovisual. Foi aí onde coñeceu un grupo de imberbes cos que durante os últimos anos da súa vida desenvolveu infinidade de proxectos, a maioría á marxe do sentido común, pero todos eles encadrados dentro do contexto da educación, a comunicación audiovisual e a cultura libre. Por certo, non creades nada de él. É un contista e un teatreiro. E publica cando en vez en www.eldiario.es.

María Yáñez é xornalista, investigadora e produtora de contidos dixitais. Leva traballando 15 anos en cine, televisión e internet, sobre todo explorando as interseccións entre estes medios. É especialista en narrativas interactivas e transmedia, en contido web e en distribución e promoción audiovisual en internet. É socia e co­fundadora de A Navalla Suíza, empresa de comunicación dixital e co­editora de EMBED.at, publicación en torno ao audiovisual integrado.Traballa de xeito independente como profesora de novas narrativas dixitais e documental interactivo, e tamén deseñando e executando estratexias de contidos dixitais e comunicación online para distintos proxectos relacionados co audiovisual. De xornalista pouco lle queda, pero colabora co xornal Praza Pública e coa Revista Luzes desde o nacemento dos dous, escribindo ás veces e formando parta do seu comité de redacción. É seareira do CD Lugo.

Venres 25 de abril as 23h na SALA DUBLÍN
Entrada: 3 euros 

ARABIAN EVILS é o proxecto de 4 rapaces de Carballo aos que lles gusta o punk, o skate, a cervexa barata e a pizza. Cristian Andrade e Andrés Andrade, membros doutros grupos xa extintos, forman a mediados de 2013 a banda xunto con Dani Vecino e Adrián Vilanova tras ver que as súas ideas musicais e a súa paixón polo monopatín eran semellantes e raras nun pobo pequeno.

Mesturan o punk melódico e soleado de bandas californianas como Green Day, NOFX ou Pennywaise coa primeira onda do hardcore como Black Flag. Todo empatizado con tinguiduras surf cos Dead Kennedys sempre presentes e un son próximo a bandas da nova xeración garagera americana como FIDLAR ou Wavves. Música para patinar ou facer o cafre en directo á beira da praia.

Apart, nace no ano 2013 en Carballo, formada por Pedro Ramos, Iago Pardiñas, Ines Blanco, Robin Mallo e Daniel Barreiro.

Unha melódica voz feminina acompañada dun son coidado e potente caracteriza o estilo do grupo. O seu repertorio combina composicións propias con temas do rock e indie internacional.

Apart é unha banda xoven que busca facerse un oco na actual escena musical.

The Gentlemen Band nace no ano 2011 da man dun grupo de adolescentes de 16-17 anos baixo o nome dos Green Cold Padron Peppers. Uns meses máis tarde, úneselles outro rapaz da súa idade como guitarra solista. Nace entón The Gentlemen Band, que mantivo a súa formación ata 2012, onde a súa vocalista, Pepa Arán, marcha aos Estados Unidos. O seu posto é ocupado por Lucía Miranda, continuando a traxectoria musical do grupo ata hoxe. Os compoñentes actuais son: Sebas López (batería), Fer Lantes (baixo), Manolo Mesejo (guitarra) Xaquín Lema (guitarra) e Lucía Miranda (voz).

As súas principais influencias son os grupos angloparlantes (principalmente do Reino Unido ou os seus dominios) das décadas dos ’60, ’70 e ’80; aínda que tamén están comezando a aflorar algúns temas propios que se verán reflexados nunha maqueta que saldrá á luz a finais deste ano.

ANTÓNDJ comeza con 17 anos poñendo discos dos Smiths,The Cure e outros moitos na mítica Roda de Malpica. Logo duns anos alonxado da música, retorna fai catro pinchando en Ponteceso, Asturias (no Soho Bar de Xixón) Burgos ( Sala Copperclub)  e Madrid ( Sala Yes we dance). Comparte cabina con dj’s como Legoteque  (salas Razzmatazz,Crappy Tuestdays ) Hall 9000 ( sala Fade in/Fade out ),Kimberly i Clark ou Hugo Le-loup.

No último ano ten unha residencia fixa na Sala A Reserva de Carballo.

Dirixe e presenta un programa de radioweb en internet chamado Zona Matrix onde podes escoitar todas as novidades da música alternativa actual,dende o rock,  pop, indie e electrónica. As súas sesións xiran dende o brit pop dos 90, ata o punk mais demoledor e o pop máis alegre,pasando pola electrónica máis bailable, sempre cun denominador común:que a xente non pare de bailar en toda a noite.

Fórum Carballo, venres 25 de abril ás 10:30h.

Internet mudou non só a forma en que se consomen, producen e distribúen os contidos audiovisuais. Está a mudar a maneira en contamos historias, a súa linguaxe e gramática, ao tempo que se multiplican os temas, nacen xéneros e formatos novos e as imaxes son recicladas e recombinadas ata o infinito. A fin de contas, o que se multiplica é a capacidade da xente para narrar en imaxes a través dos medios que ten ao seu dispor, desde os móbiles ou as cámaras web ata Youtube ou Vine, e compartilas en forma de webseries, webdocumentais, tutoriais, remixes, memes ou os gifs animados.

Para compartir ideas e reflexionar sobre cada a ónde avanzan as narrativas en internet contaremos con David Sainz e Teresa Segura (Different Entertainment, Malviviendo), que tanto triunfan no formato webserie como exploran os microvídeos con Vine ou o formato longametraxe con Obra 67; con Felipe G. Gil (EMBED, ZEMOS98) que leva anos investigando e practicando en torno á cultura do remix e as narrativas audiovisuais de código aberto, e a guionista de TV Lidia Fraga, experta na creación de ficción en distintas plataformas.

Modera: María Yáñez