“Dou cobertura ao fútbol femenino da Costa da Morte, conto a actualidade sobre o fútbol costeiro, falando de como lle van aos equipos da zona e as xogadoras.”

Instagram: @mareandoxogo

“Pódese ver unha mestura do que teño pola cabeza: xornais inventados por min con noticias como mínimo hilarantes, memes de diversa índole (políticos, absurdos ou simplemente bromas internas entre amigues) e un constante drag de alcalde.

Sinceramente, non sabería definir nin eu o que fago.”

Instagram: @chutenmeme

“Un podcast a través da psicoloxía, o feminismo e a diversidade co que aportar ferramentas para estar mellor. Para iso converso maioritariamente con mulleres e disidencias sexuais feministas sobre os seus aportes profesionais e activistas, as súas traxectorias vitais e o coñecemento, accións, relatos… que precisamos para afrontar o estrutural que nos atravesa e vivir, xa, doutras formas. Facemos os episodios en vivo e a un ritmo de conversa humano para recuperar estar realmente en presenza, cunha capacidade profunda de atención e de vincularnos e reforzar as nosas comunidades, que son ferramentas en si mesmas.”

Youtube: @PRENDIDÍSIMAPODCAST

“Miradenovo é un espazo de creación de contido en galego onde falo de Galicia dende a arquitectura, o urbanismo e o deseño consciente. Falo de darlle unha segunda vida aos mobles, poñendo en valor o que xa temos ou mercando mobles de deseño de segunda man. Comparto tamén a historia do urbanismo das cidades e vilas galegas, descubrindo plans e proxectos urbanísticos e compartindo curiosidades que explican por que os nosos lugares son como son hoxe.

Tamén falo de arquitectura galega con maiúsculas: das mulleres arquitectas que abriron camiño, dos edificios menos coñecidos que merecen recoñecemento e de todo aquilo que paga a pena mirar… de novo.”

Instagram: @miradenovo

“O meu perfil de ilustración é un espazo onde expoño as preocupacións sociais actuais da xente nova: a incerteza, a presión estética, a saúde mental, a identidade ou a precariedade laboral e de vivenda que estamos a vivir. A través dunha linguaxe visual propia, transformo estes pensamentos en bosquexos que buscan xerar diálogo e reflexión, convertendo sentimentos comunitarios en ilustracións con acedume. O meu traballo céntrase en crear narrativas mediante debuxos rápidos, apostando pola síntese visual para contar máis con menos elementos. Interésame explorar como a economía da liña pode reforzar á mensaxe e conectar dunha maneira rápida e honesta. A ilustración é unha ferramenta de expresión persoal e crítica coa que procuro tamén integrar a nosa lingua. Pretendendo darlle un espazo máis ao galego en plataformas coma as redes sociais.

En resumen, esta conta funciona coma un porfolio vivo que busca compartir pensamentos e fomentar á reflexión individual.”

Instagram: @larias_wrk

“Falo de todo e de nada, dende a anécdota máis insignificante ata a reflexión máis existencial. Todo o que lle pode pasar pola cabeza a un rapaz de 24 anos na era hipermoderna é o que se pode atopar no meu perfil.”

Tiktok: @ant0ntisim0

“O meu propósito é achegar a cultura e a historia galega a máis xente. Tento empregar unha linguaxe accesible e fomentar o interese pola historia da nosa terra mediante vídeos que se adaptan ao noso presente. Tamén pretendo fomentar o pensamento crítico e a importancia de coñecer o noso pasado.”

Instagram: @adochinto
Tiktok: @adochinto

“Creo contido principalmente sobre muralismo porque me apaixoa a arte urbana. É unha temática que dá moito xogo, e como son moi curiosa e me fascina explorar a forma de comunicar, tento sempre combinalo con cultura, historias, artistas… 

Aínda así, gústame non limitarme e crear sobre aquilo que me interesa fóra do marco da arte, como pode ser calquera contido que esté aliñado cos meus valores, sexa cultural, música, comida, lifestyle, e mesmo humor ou política.”

Instagram: @sonsdecande