O Carballo Interplay ten un papel vital a nivel galego á hora de apoiar e impulsar aos novos creadores e creadoras. Un exemplo disto é o podcast O Faiado, proxecto creado en 2023 por estudantes de xornalismo e comunicación audiovisual, para comentar a actualidade sobre a cultura pop, galega e internacional, así como comentar tendencias, reflexionar e, sobre todo, botar unhas boas risas.

Este podcast foi gañador do pitching a mellor proxecto dixital en galego (na categoría de canle) da última edición do Interplay, e agora volve ao festival, xa consolidado, para facer un show en directo onde todo o mundo poderá disfrutar da vangarda do podcast en galego. Polos seus micrófonos teñen pasado creadores e creadoras como Bruno Arias, Rodri Míguez, Sara Seco, Lara Caeiro, Leti da Taberna, Eris Mackenzie, Su Garrido Pombo, The Rapants, Sabela Ramil… Esta vez será a quenda do director Javier Ferreiro e a actriz Blanca Martínez, da serie “Mariliendre”.