Historia e equipo

O Carballo Interplay naceu no 2014 como o primeiro festival de webseries do Estado, pero pouco a pouco converteuse tamén nun punto pioneiro en Galicia para creación, a reflexión, para o coñecemento e para o desenvolvemento do pensamento. Os actos e os paneis son conversas reais, e os offs do festival valen para reflexionar en compañía. 

Nun momento no que moita xente está valorando abandonar as redes, nós queremos reivindicar o internet que nos gusta. O internet que nos aporta, que nos ensina, que fai que nos xuntemos e que teñamos ganas de crear algo da nada. O mundo online nace como unha ferramenta colaborativa, en gran medida sen ánimo de lucro, construída píxel a píxel por xente que quería falar con outra xente, coñecer as súas realidades, gozar do que lle gusta e construír a partir de aí. Ese é o internet do Carballo Interplay. 

Somos un punto de encontro para os creadores e as creadoras dixitais, para ver as mellores series web, un lugar no que conversar  non só sobre o que está a acontecer na rede, senón tamén na sociedade. Un lugar para acoller debates que atravesan o mundo que habitamos e para idear como construír o que queremos habitar.

Abrimos orgullosamente cada ano os tentáculos das liñas e actividades paralelas do festival apoiándonos no dixital para poder actuar tamén como un “evento arredor das ideas”, sucedan no plano no que sucedan.